Амбасада ЗША праводзіць фотаконкурс «Мая Амэрыка»

Амбасада ЗША ў Беларусі паведамляе аб правядзеньні фотаконкурсу «My America» з 1 студзеня па 15 сакавіка 2010 года. Да ўдзелу ў конкурсе запрашаюцца грамадзяне Беларусі, якія жадаюць падзяліцца фотаздымкамі ўнікальных момантаў свайго знаходжаньня ў ЗША.

На конкурс прымаюцца ня больш за 5 аўтарскіх працаў у фармаце jpeg у наступных намінацыях:

• Культура і традыцыі ЗША
• Прырода ЗША
• Архітэктура і памятныя мясьціны ЗША
• Гумарыстычныя моманты падчас знаходжаньня ў ЗША

Да разгляду прымаюцца фотаздымкі, што былі зробленыя ўдзельнікамі конкурсу падчас знаходжаньня ў Злучаных Штатах Амэрыкі. Пры прадстаўленьні фотаздымкаў павінны захоўвацца аўтарскія правы іх стваральнікаў. Аўтары нясуць адказнасьць за зьмест сваіх працаў і павінны ўстрымлівацца ад вобразаў і сюжэтаў, якія могуць абразіць пачуцьці іншых людзей. Амбасада ЗША пакідае за сабой права выкарыстоўваць матэрыялы фотаконкурсу ў электронных і друкаваных публікацыях.

Пераможцы конкурсу будуць абраныя прафэсійным журы.

Крытэры ацэнкі працаў: якасьць, арыгінальнасьць, імправізацыя, натхненьне, яркасьць вобразу.

Парадак удзелу ў конкурсе і прадстаўленьня працаў: работы на конкурс можна дасылаць на электронны адрас photos@usembassy.minsk.by альбо на паштовы адрас:  

Аддзел інфармацыі, адукацыі і культуры Амбасады ЗША
вул. Герцэна,2А
220030 Менск
Рэспубліка Беларусь 

Разам з работамі трэба даслаць анкетныя даныя, што ўказаныя ў дадатку. Фотаздымкі, дасланыя на папяровых носьбітах, не вяртаюцца.

У назвах электронных файлаў трэба пазначыць сваё прозьвішча і нумар работы (напрыклад, ivanov_01.jpg.).

Дадатковую інфармацыю можна атрымаць у Аддзеле інфармацыі, адукацыі і культуры Амбасады ЗША па тэлефоне (017) 217-04-81. 

Паводле прэс-рэлізу