Сібірскі ўнівэрсытэт абвінавачаны ў эксплуатацыі студэнтаў

Расейская пракуратару абвінавачвае кіраўніцтва філіялу Сібірскага фэдэральнага ўнівэрсытэту ў прымусовым прыцягненьні студэнтаў да працаў па ліквідацыі аварыі на Саяна-Шушанскай ГЭС. Уладальнік станцыі сьцьвярджае, што студэнты самі захацелі дапамагчы ліквідаваць катастрофу.

У выніку пракурорскай праверкі высьветлілася, што хакаскіх студэнтаў другога-пятага курсаў прыцягнулі да працаў ба разборы завалаў на ГЭС у верасьні, з-за чаго пачатак навучальнага году быў перанесены на 1 кастрычніка. Згоды студэнтаў ніхто не пытаў.

Паведамляецца, што некалькі студэнтаў зьвярнуліся да мэдыкаў, адзін зь іх быў шпіталізваны. Пракуратура тлумачыць гэта тым, што навучэнцаў прымусілі прыбіраць са сьцен і падлогі трансфарматарнае масла, небясьпечнае для здароўя. Спэцыяльную вопратку студэнты атрымалі толькі праз два тыдні пасьля пачатку працы.

У выпадку адмовы працаваць на станцыі студэнтам пагражалі адлічэньнем, а працоўныя дамовы былі заключаныя са спазьненьнем на месяц.

Па словах прадстаўнікоў кампаніі «РусГІДРА», якая кіруе Саяна-Шушашнскай ГЭС, студэнты самі зьявіліся на станцыі ў першы ж дзень пасьля катастрофы, а з-за надзвычайнай сытуацыі дамова была заключаная не своечасова, і зарплата выплачвалася з затрымкамі, піша газэта «Газета». З 5 кастрычніка студэнты на ГЭС больш не працуюць, а кіраўніцтва вынесла ім падзяку за ўдзел у ліквідацыі наступстваў аварыі.

Аварыя на ГЭС адбылася 17 жніўня і прывяла да поўнага або частковага разбурэньня дзевяці з 10 гідраагрэгатаў станцыі і сьмерці 75 чалавек. Зараз гэтая найбуйнейшая ў Расеі гідраэлектрастанцыя спыненая. На яе ўзнаўленьне можа спатрэбіцца ад трох да пяці гадоў і $1 370 мільёнаў.

Супраць дырэктара Саяна-Шушанскай ГЭС узбуджаная адміністратыўная справа аб парушэньні працоўнага заканадаўства.