Фільмы Канскага фэстывалю пакажуць у Менску

Паказам фільма Пэдра Альмадовара «Разамкнёныя абдымкі» ў Доме кіно распачаўся чарговы сэзон праекту «Канаманія». Праект знаёміць аматараў кіно зь лепшымі фільмамі плянэты, якія прайшлі адбор для ўдзелу ў Канскім кінафэстывалі.

Галоўны герой фільма — вядомы рэжысёр і сцэнарыст, які ў аўтамабільнай катастрофе страціў зрок і любімую жанчыну. Да трагедыі прывяла гісторыя любоўнага чатырохкутніка. Праз 14 гадоў сцэнарыст зноў вяртаецца да гэтых падзеяў. Галоўную жаночую ролю ў фільме сыграла Пэнелопа Крус.

Па словах Сукманова, «Разамкнёныя абдымкі» карысталіся вялікім посьпехам на Канскім фэстывалі, хоць і не атрымалі ўзнагарод.

Як перадае БелаПАН, куратар «Канаманіі» Ігар Сукманаў паведаміў, што ў пятым сэзоне праекта гледачам пакажуць фільмы 62-га Канскага фэстывалю. Ён спадзяецца, што на менскіх экранах зьявяцца фільм-уладальнік Залатой пальмавай галіны «Белая стужка» Міхаэля Ханэке і карціна «Прарок» Жака Адзьяра, якая ўзяла Гран-пры. Кінакрытык адзначыў, што сёлетні фэстываль увайшоў у гісторыю як адзін з самых радыкальных і жорсткіх.

Плянуецца таксама паказаць іспанскую карціну «Гукавая карта Токіо», якая, на думку Сукманава, у першую чаргу прыцягне ўвагу прыхільнікаў творчасьці Харукі і Ру Муракамі. Акрамя таго, па словах кінакрытыка, гледачоў можа зацікавіць псыхалягічны трылер «Не азірацца» з Монікай Белучы і Сафі Марсо.

За час існаваньня «Канаманіі», пад яго эгідай адбыліся прэм’еры карцін такіх майстроў кіно, як Вуды Ален, Эмір Кустурыца, Клінт Іствуд, Вонг Кар-Вай і іншых.

Глядзіце драму «Разамкнёныя абдымкі» на працягу наступнага тыдня ў Доме кіно.