3-га верасьня фрык кабарэ бэнд «Серебряная Свадьба» ў «West World Club»

Пазнаёмцеся зь гісторыяй аднаго з самых неверагодных цыркаў мінулага! У пачатку мінулага стагодзьдзя па дарогах Эўропы калясіў дзіўны цырк, які праславіўся сваім фантастычным нешанцаваньнем — «Cirque D`omelette». Складаўся ён з артыстаў крайне няўдачлівых. Кожны зь іх быў хадзячая катастрофа, але разам яны ўяўлялі кампанію больш чым пацешную.

«Серебряная свадьба» на Канцэрце імя добрага чалавека ў лютым 2007-га.

Быў сярод іх і няўдалы дрэсіроўшчык тыграў, перакваліфікаваны ва ўладара тыгровых скочак, і ліліпут-пераростак і акрабаткі — збор вывіхаў і ўдараў, і факір, нямала пацярпелы ад уласных магічных маніпуляцый, і недапілаваная ім асыстэнтка. Узначальваў трупу мсье Кофрфор, асілак ў адстаўцы, уладальнік стальных цягліцаў і ўнікальнай калекцыі матылькоў.

Паважаная публіка, прымаючы іх правальнае прадстаўленьне за зьдзек, нярэдка закідвала артыстаў курынымі яйкамі, адсюль і нарадзілася назва трупы. Стаўшы героем мэдыцынскіх справаздач і паліцэйскіх анэкдотаў «Cirque D`omelette» нечакана зьнік пры надзвычай таемных абставінах. І вось праз стагодзьдзе кабарэ бэнд «Серебряная свадьба» прысьвячае сваю новую канцэртную праграму гэтым выдатным артыстам, гігантам духу, сапраўдным майстрам сцэнічнага правалу.

Сустракайце «Cirque D`omelette»!