Маё сэрца б’ецца!

У час міжнароднага Дня абароны дзяцей у Менску 30 траўня ў ДК МАЗ пройдзе канцэрт-акцыя «У абарону жыцьця». Яго асноўная мэта — агучыць свой голас у падтрымку адной з самых неабароненых катэгорый дзяцей — ненароджаных немаўлят. Асноўнай фішкай праекту сёлета будзе прэм’ера мюзікла «Маё сэрца б’ецца». У ім распавядаецца пра горад, у якім жывуць ненароджаныя дзеці. Яны чакаюць сустрэчы са сваімі бацькамі і праходзяць падрыхтоўку у Нябеснай Школцы. Кожны зь іх ужо ведае, кім павінен стаць на зямлі. Але ці змогуць яны ажыцьцявіць свае мары?

«Мы хочам паказаць людзям, што дзеці, якія яшчэ не нарадзіліся, ужо зьяўляюцца людзьмі, у якіх закладзены патэнцыял. Кожны зь іх нараджаецца ў гэты сьвет для пэўнай місіі, — кажа рэжысёр мюзікла Алена Васілеўская. — Я веру, што пасланьне, пакладзенае ў мюзікл, паўплывае на сэрцы многіх людзей і нават дапаможа некаторым дзецям нарадзіцца. Пасьля прагляду дарослыя змогуць паглядзець на дзяцей па-іншаму, асэнсоўваючы, што яны — адзіная абарона і надзея для сваіх дзяцей у тым, каб яны патрапілі ў гэты сьвет».

На сцэне таксама выступіць рэп-гурт «Честное Слово». Адзін зь яе салістаў, Жора Лапцёнак, разам са сваёй жонкай Ганнай будуць вядучымі канцэрту. Вось, што яны кажуць:

«Удзел у акцыі — магчымасьць падняць свой голас у абарону маленькіх ненароджаных дзяцей. Але ня проста сказаць слова ў абарону, а, хутчэй, паспрабаваць данесьці каштоўнасьць і ўнікальнасьць чалавечага жыцьця з самага першага дня яе існаваньня. Аборт — ня проста праблема асобных людзей. Гэта — праблема нацыі. Ставячыся да яе з абыякавасьцю, мы кожны дзень губляем маленькіх грамадзян, якія, магчыма, у будучым будуць адказам на многія пытаньні, якія стаяць сёньня ў грамадзтве. А калі асабіста… Мы самі бацькі. Немагчыма апісаць шчасьце зьяўленьня роднага чалавека і падзяка за тое, што нас палічылі вартымі выхаваць Асобу! Для нас вялікая радасьць назіраць за ростам, разьвіцьцём, дасягненьнямі, гульнямі і інтарэсамі нашага сына. Зь яго нараджэньнем у нашым жыцьці зьявілася яшчэ больш сэнсу, а сям’я стала багачэй і прыгажэй».

У рамках акцыі таксама будзе падведзены вынік конкурсу дзіцячага малюнка «Сьвет з марай» і Конкурсу расповедаў і вершаў, які праводзіў сямейны Інтэрнэт-партал Ребёнок.BY. Галоўныя пераможцы атрымаюць прызы і дыплёмы ад арганізатараў.

Канцэрт абяцае быць жывым, дынамічным і вясёлым, але ў той жа час некалькі драматычным. Арганізатары спадзяюцца, што некаторыя людзі змогуць па-іншаму паглядзець на каштоўнасьць чалавечага жыцьця і штосьці зрабіць для таго, каб абараніць яго.

Таксама створаная адмысловая старонка праекту «У абарону жыцьця», на якой наведнікі могуць прачытаць цікавыя матэрыялы і кароткую інфармацыю пра мінулыя канцэрты, якія праходзілі раней.