Па Менску ў пошуках Сьвятога Патрыка
Каля паўсотні прыхільнікаў ірляндзкай культуры разам з сапраўдным ірляндцам прайшлі ўчора па вуліцах Менску, такім чынам прадэманстраваўшы, што і ў Беларусі таксама жыве памяць аб сьвятым Патрыку і зялёным трылісьніку. Скончылася шэсьце, па даўняй беларускай традыцыі, сустрэчай з амапаўцамі.
Сьвяточны парад, як гэта дзейства анансавалі яго арганізатары — некалькі менскіх клюбаў ірляндзкіх танцаў — традыцыйна распачаўся ля помніку Янку Купалу і прайшоў па ходніках галоўнага праспэкту сталіцы. Шэсьце было прысьвечанае Дню сьвятога Патрыка. Гэта сьвята ёсьць вельмі папулярнай ва ўсім сьвеце нагодай прайсьціся па праежджых частках мэгаполісаў і прыгадаць добрым словам краіну, якая падаравала сьвету знакамітага прапаведніка хрысьціянства і піва «Гінэс».
У Беларусі сьвята адзначаюць больш сьціпла. Амаль кожны з удзельнікаў шэсьця меў на сабе нешта зялёнае: ці то шалік, ці то спадніцу, ці ўвогуле зялёна-бела-памаранчовы сьцяг Ірляндыі ў руках альбо намаляваны на шчоках. Нехта імкнуўся да большага падабенства да натуральных ірляндцаў, апрануўшы ў гэты марозны пахмурны дзень традыцыйныя мужчынскі спадніцы — кілты.
Адзіны ж сапраўдны ірляндзец Лім — ветлівы сівабароды спадар у чорнай шапачцы і акулярах — вылучаўся ў гэтым натоўпе шчасьлівай беларускай моладзі хіба што сваёй надта ўжо абыдзеннай вопраткай:
«Я назіраю за сьвяткаваньнем Дня сьвятога Патрыка ў Менску з 1999 года. З тых часоў колькасьць удзельнікаў і маштаб сьвята ўзрастаюць з кожным годам, — прыгадвае Лім. — У Ірляндыі Дзень сьвятога Патрыка — гэта вельмі значнае, вясёлае і яркае сьвята. Гэта лепшы дзень у годзе. У Дубліне сёньня вялікае сьвята…
Цікаўнасьць да ірляндзкай культуры ў Беларусі ўсё больш узрастае, дзякуючы, перш за ўсё, заняткам ірляндзкімі танцамі. У Менску праводзяцца фэстывалі, прысьвечаныя нашым танцам, што ўзмацняе папулярнасьць ірляндзкай культуры», — адзначае Лім, які ўжо шмат год працуе ў адной з гуманітарных місій у Менску.
Паступова, губляючы сьцягі і ўдзельнікаў, шэсьце дабралася да плошчы Якуба Коласа. Там фанатаў Патрыка чакалі яшчэ адныя даўнія прыхільнікі ўсяго зялёнага — беларускія амапаўцы, якія паведамілі аб несанкцыянаванасьці шэсьця і прапанавалі разысьціся. Удзельнікі шэсьця зьвярнулі ірляндзкія сьцягі. Сьвята перайшло ў менш фармальнае русла з абавязковым ірляндзкім гінэсам, кошты на які некаторыя менскія рэстарацыі ў гэты вечар адмыслова зьнізілі.
Дзень сьвятога Патрыка — дзяржаўнае сьвята Ірляндыі, прысьвечанае сьвятому Патрыку — заступніку Ірляндыі. Згодна зь легендай, эпіскап Патрык памёр 17 сакавіка 493 года. З тых часоў гэтую дату адзначаюць штогод. Сымбаль сьвята — трылісьнік — выява ліста канюшыны.
Фотарэпартаж з шэсьця да Дня Сьвятога Патрыка
Аўтар фота - Julia Fox