«Серебряная свадьба» ладзіць вялікі клюбны канцэрт у абарону валізак

Для «Серебряной свадьбы» гэтая вясна выдалася надзвычай насычанай яскравымі падзеямі, разнастайнымі вандроўкамі і прыгодамі. Адразу ж пасьля вялікага сольнага канцэрту, што адбыўся 8 сакавіка ў КЗ «Менск» і сабраў 1300 гледачоў, фрык кабарэ бэнд прыступіў да працы над саўндтрэкам да дзіцячага анімацыйнага фільма маскоўскай студыі «Пілот».

«Серебряная свадьба» на Канцэрце імя добрага чалавека ў лютым 2007-га.

Па завяршэньні запісу, у сярэдзіне красавіка «Серебряная свадьба» адправілася ў чарговы канцэртны тур па поўдні Расеі, які ахапіў Стаўрапаль, Краснадар, Таганрог і Растоў-на-Дону. Выступы прайшлі пры поўных залях. Адтуль музыкі накіраваліся ў паўночную сталіцу Расеі — горад Санкт-Пецярбург, дзе з посьпехам адыгралі сольны канцэрт у клюбе Святланы Сурганавой «А2». І, нарэшце, гурт даў два клюбных канцэрта ў Маскве і адыграў у эфіры праграмы «Браць жыўцом!» на музычным канале О2ТВ.

Фінальны канцэрт гэтага тура адбудзецца 18 траўня ў Менску ў клюбе Night Star і будзе прысьвечаны Міжнароднаму дню абароны валізак. Рэтра-валізкі зьяўляюцца адным з сымбаляў бэнда, спадарожнікамі ва ўсіх падарожжах і проста любімымі хатнімі істотамі. Валізкі, такія практычныя і ў той жа час кранальныя, з даўніх часоў суправаджалі чалавека, захоўваючы яго таямніцы і зьяўляючыся праўдзівымі «носьбітамі» яго каштоўнасьцяў.

У нашы дні адзін за другім зьнікаюць антрэсолі і каморы, а разам зь імі і прыгажосьць простых і надзейных рэчаў. Валізкі паступова «выміраюць» як від. Гэты факт відавочны ўсім, каму неабыякава захаваньне гарадзкіх культурных традыцый.

У сувязі з гэтым 18 траўня абвешчана Днём абароны валізак. У гэты дзень фрык кабарэ бэнд «Серебряная свадьба» запрашае шаноўных валізак, іх шчасьлівых уладальнікаў і ўсіх-усіх-усіх на вялікі клюбны «Канцэрт у каморы», які пройдзе ў клюбе «Night Star». Гэтае мерапрыемства будзе напоўнена атмасфэрай таямнічасьці і нечаканасьці, уласьцівай усім каморам, антрэсолям, бабуліным кладоўкам і іншым месцам, прывабных для кожнага з нас з самога дзяцінства.

Вас чакаюць: неспадзеўкі і цуды, навінкі парыскіх блышыных рынкаў і гарышчаў, непаўторныя танцы ад кардэбалета, набранага на марсэльскай барахолцы… Новыя і старыя песьні бэнда будуць выкананыя абноўленым складам — адмысловым госьцем праграмы стане знакаміты чэскі трамбаніст. Для ўсіх валізак у гэты вечар уваход бясплатны, а суправаджаючага яго госьця чакае сюрпрыз. І нарэшце! Толькі падчас канцэрту можна будзе набыць новую калекцыйную складанку песьняў бэнда, выдадзеную на CD!

Запрашаем усіх на «Канцэрт у каморы»!