Эўрапейскае спаборніцтва маладых відэа-мастакоў: здымі відэа і едзь у Амстэрдам!

Калі табе яшчэ ня споўнілася 26 і ты здымаеш цікавае відэа нават проста на мабільны тэлефон — ёсьць магчымасьць паехаць у Амстэрдам за ўзнагародай. Там 3-5 ліпеня будзе адбывацца StrangerFestival. Па нашай інфармацыі, арганізатары вельмі чакаюць удзельнікаў зь Беларусі. Але трэба пасьпяшацца, бо дэдлайн — праз тыдзень.

«Мы б хацелі пабачыць відэа, якія распавядаюць пра мары і жаданьні маладых беларусаў — у тым ліку ў правакатыўнай форме. Уся сутнасьць StrangerFestival у тым, каб выказаць сваё меркаваньне на тэму, якая цябе асабіста больш за ўсё цікавіць у дадзены момант. 

Мы ня хочам навязваць сваё меркаваньне наконт таго, пра што павінна быць відэа, бо мы верым, што самы лепшы спосаб самавыражэньня ў тым, чым сам творца ганарыцца і тым, што ён ці яна хоча распавесьці сьвету. Маладыя людзі самі зьяўляюцца самымі лепшымі экспэртамі сваіх жыцьцяў і праблемаў, а ня мы. Таму відэа могуць быць і адкрыта палітычнымі, і абсалютна асабістымі. Важна тое, каб відэа ўяўляла ўнікальны і арыгінальны погляд на сябе і жыцьцё», — пракамэнтаваў для Generation.bY праграмны дырэктар фэстывалю Tommi Laitio.

Для таго, каб трапіць на фэстываль, трэба даслаць свой ролік (ад 1 да 5 хвілінаў) на сайт www.strangerfestival.com. Аўтары лепшых відэа будуць запрошаныя 3-5 ліпеня ў Амстэрдам. І змогуць выйграць там камэру і лэптоп.

StrangerFestival мае тры намінацыі: афіцыйная StrangerAward 2008, The Stranger Audience Award (узнагарода ад аўдыторыі сайта StrangerFestival) і The MTV StrangerAward (узнагарода ад тэлеканалу MTV).

Праўда, каб пасьпець, трэба пасьпяшацца, бо дэдлайн скончваецца праз тыдзень — 15-га траўня.

Усе фіналісты (па 5 ад кожнай намінацыі) будуць запрошаныя ў Амстэрдам на  StrangerFestival 3-5 ліпеня. Запрашэньне ўключае пакрыцьцё транспартных і жыльлёвых выдаткаў.

Пераможцы будуць узнагароджаныя ў часе адмысловай цырымоніі на фэстывалі. А ўсе фінальныя відэа будуць выдадзеныя на DVD, што разыйдуцца 20 тысячамі копіяў пад час адмысловага тура па Эўропе.

Дарэчы, прома-відэа да фэстывалю зь беларускімі субтытрамі можна пабачыць у суполцы 4asapopi3.

Працэдура адбору для StrangerAward 2008 і MTV StrangerAward

17-18 траўня на выходных будзе адбывацца прагляд у Амстэрдаме. У ім прымуць удзел каля 30-ці студэнтаў (якія вывучаюць мэдыі, кіно, моладзь і мастацтва), маладыя журналісты і экспэрты, а таксама арганізатары фэстываля.

Аднак паколькі арганізатары чакаюць, што будзе даслана каля 1000-2000 ролікаў (на дадзены момант іх 483), то яны самі зробяць хуткі папярэдні адбор працаў. У выніку застанецца 250-300 відэа, якое будзе прагледжанае на выходных.

Апошнім этапам будзе канчатковы выбар, які зробяць сусьветна-вядомы кінарэжысэр і прадстаўнік MTV.

Часу застаецца мала, але Амстэрдам насамрэч бліжэй, што можа падавацца ;)