Памёр Альбэрт Гофман — навуковец, які вынайшаў LSD

Швэйцарскі хімік Альбэрт Гофман (Albert Hofmann) памёр на 102 годзе жыцьця ад сардэчнага прыступу. Найбольш навуковец вядомы як стваральнік наркотыка LSD.

Упершыню Гофман сынтэзаваў LSD (дыэтыламід лізэргінавай кіслаты), які выклікае галюцынацыі і скажае ўспрыняцьцё часу і прасторы, у 1938 годзе ў час працы па вывучэньні ўласьцівасьцяў лізэргінавай кіслаты. Аднак эфэкт наркотыку ён вынайшаў толькі праз пяць год — у 1943 годзе, пасьля таго, як сам выпадкова ўжыў невялікую дозу.

LSD актыўна і пасьпяхова выкарыстоўваўся для лекаваньня разнастайных псыхічных разладжваньняў у ЗША і Велікабрытаніі. Але ў 1965 годзе выпуск LSD цалкам спынілі праз заканадаўчую забарону з-за грамадзкага пратэсту. 

А ў 1979 годзе Гофман напісаў кнігу «LSD: Маё праблемнае дзіця».

На думку самаго навукоўцы, у забароне часткова вінаватыя дыскрэдытаваўшыя яго моладзевыя рухі 1960-х гадоў. Гофман лічыць, што забарона сталася часткаю барацьбы ўладаў з анархічна накіраванай моладзьдзю.

На фота Альбэрту Гофману 100 год. Выява з photo.net.

Цікава, што ў апошнія гады жыцьця Гофман атрымаў ад уладаў Швэйцарыі дазвол на ўзнаўленьне мэдыцынскіх экспэрымэнтаў з выкарыстаньнем LSD. Аднак не пасьпеў прыступіць да іх.

Паводле сьпісу «100 геніяў-сучасьнікаў», апублікаванага кампаніяй Synectics на аснове апытаньня 2007 году ў Велікабрытаніі, Альбэрт Гофман займае першае месца.