Чаму людзям падабаюцца доўгія ногі?

За тым, як мадэлі гарцуюць па подыюму, з аднолькавай зацікаўленасьцю назіраюць як мужчыны, так і жанчыны. Людзей, незалежна ад полу, больш цягне да тых, хто вышэй. Навукоўцы ўжо даўна тое запрыкмецілі, але толькі зараз задумаліся над тым, які ўнёсак у агульную прывабнасьць робіць даўжыня ног.

У дасьледван­ьні, якое праводзілася Багуславам Паўлоскім з Унівэрсытэту ў Вроцлаве, узялі ўдзел больш за 200 мужчын і жанчын. Высьветлілася, самымі прывабнымі лічацца людзі, даўжыня ног якіх на 5% больш за сярэднюю.

Добраахвотнікам прапанавалі ацаніць прывабнасьць людзей на фотаздымках. Некаторыя здымкі былі апрацаваныя: мянялася даўжыня ног.

То бок, усе людзі на выявах былі аднолькавага росту, але даўжыня ног адрозьнівалася ад сярэдняй сярод палякаў на 5, 10 і 15%.

Незалежна ад сваёй зьнешнасьці, удзельнікам экспэрымэнту больш за ўсё спадабаліся людзі, чые ногі былі на 5% даўжэй сярэдняга. Далей ішлі тыя, у каго нармальная даўжыня ног, а за імі — тыя, у каго плюс 10%.

Па меркаваньні навукоўцаў, тое натуральна і тлумачыцца лёгка: доўгія ногі значаць здароўе.

У папярэдніх дасьледваньнях высьветлілася, што людзі з кароткімі нагамі больш пастаўленыя пад атлусьценьне, сардэчна-сасудзістыя захворваньні, дыябэт, інсульт.

Хаця ў дасьледваньні Ўнівэрсытэта Вроцлава ўдзельнічалі толькі паляка, Паўлоўскі мяркуе, што тое ўласьціва і іншым нацыянальнасьцям.

Выкладчык з Унівэрсытэту Ньюкасала Марцін Тові, адзначае, што больш доўгія ногі — гэта толькі адзін з мноства парамэтраў, якія сьведчаць аб добрым здароўі, асабліва ў кабет.

Ён тлумачыць, што даўжыня ног у жанчыны — гэта прыкмета дастатковага і добрага харчаваньня, спрыяльных умоваў разьвіцьця, што ўплывае на фэртыльнасьць.

Дарэчы, самыя доўгія ногі - 127 сантымэтраў — чэскай мадэлі Адрыяны Скленарыкавай патрапілі ў Кнігу рэкордаў Гінэса. Ейная бабуля была вельмі засмучаная, што маленькая Адрыяна не ўмее капаць бульбу: каму ў Чэхіі патрэбная такая  жонка? Але мужа свайго Адрыяна знайшла далёка ад ра­дзімы і дзякуючы зусім ня бульбе. Футбаліст Крыстыян Карэмбо разумее кошт здароўя. Ці то доўгія ногі, ці што іншае трымаюць на подыюме Адрыяну значна дольш, чым ейных калежанак — 10 год.