Сёньня БАЖ узнагародзіць пераможцаў акцыі «ФотаPositive»

У офісе Беларускай Асацыяцыі Журналістаў сёньня пройдзе ўзнагароджаньне пераможцаў акцыі «ФотаPositive» і прэзентацыя лепшых фотатвораў, дасланых на конкурс. Адмысовая акцыя БАЖ праходзіла ў Сусветны дзень свабоды друку - 3 траўня. Ідэя  палягала ў тым, каб сабраць з дасланых фотаздымкаў «Адзін дзень з жыцьця Беларусі ў пазытыве».

БАЖ прапанаваў беларускім фотааматарам засяродзіцца на «пазытыўным» бачаньні навакольнага сьвету і дасылаць свае фотаўражаньні на суд прадстаўнічага журы.

У 18.00 у офісе БАЖ (пл. Свабоды, 17-304) будуць узнагароджаныя пераможцы, імёны якіх былі абвешчаныя 17 траўня – у дзень вынаходніцтва каляровага фота:

• І месца заняў Павел Бераснёў (г. Мінск), аўтар фота «Пазытыўныя караблі».
• ІІ месца заняў Валеры Казюмінскі (г. Мінск), за здымак «Начная сяўба».
• ІІІ месца заняў Паўлюк Міцкевіч (г. Гомель). Аўтар даслаў сваю творчую працу без назвы, але журы таксама ўбачыла пазытыў у гэтым фотаздымку.

Заахвочвальны прыз «Цікавы ракурс» атрымае таксама Паўлюк Міцкевіч (здымак). Ляўрэатам другога заахвочвальнага прызу – «Цікавая кампазіцыя» - стаў Андрэй Бастунец (г. Мінск) за фота «Папараццы», зробленае ім 3 мая ў Гродне.

Па-за конкурсам былі адзначаны фотапрацы «Перад захадам сонца на рацэ Волма» Валерыя Казюмінскага (г. Мінск) і здымак пад назвай «Рэчаіснасьць» Ганны Ільіной (г. Магілёў).

Пры вызначэньні пераможцаў журы ацэньвала фотаздымкі, ня ведаючы імёнаў іх аўтараў. Кожны здымак меў толькі нумар і назву (калі аўтар яе даў).

//Паводле прэс-службы БАЖ