Кітайскія ўлады за некалькі гадзінаў зачынілі доступ да новага сайту «Рэпарцёраў бязь межаў»

Уладам Кітая спатрэбілася ўсяго толькі ад пяці да васьмі гадзін, каб адсачыць і зачыніць новы сайт кітайскага аддзяленьня арганізацыі «Рэпарцёры бязь межаў» (Reporters Without Borders, RWB).

Сайт www.rsf-chinese.org быў адчынены 3-га траўня, аднак ужо праз некалькі гадзін доступ да яго кітайскіх карыстальнікаў быў блякаваны. Праз некаторы час RWB адчыніла рэсурс пры падтрымцы іншага правайдэра, аднак сайт быў зноў блякаваны з тэрыторыі Кітая.

Кітайскія цэнзурныя структуры карыстаюцца адмысловымі аўтаматызаванымі фільтрамі для выяўленьня непажаданых сайтаў. У выніку падобных мер кітайскія карыстальнікі пазбаўленыя доступу да тысяч апазыцыйных рэсурсаў, зьмест якіх падаўся цэнзарам правакацыйным.

Акрамя праграмных фільтраў кітайская інтэрнэт-паліцыя па дадзеных AFP выкарыстоўвае працу 30-40 тысяч чалавек, з дапамогай якіх і рэалізуецца ўрадавая праграма Great Firewall.

Сёньня ў краіне налічваецца 123 мільёна інтэрнэтчыкаў, большасьць з іх - маладыя людзі, якіх, як упэўненыя кітайскія ўлады, неабходна абараніць ад тлятворнага ўплыву інтэрнэту.