Кампутаровыя гульні для лепшай адукацыі творчых асобаў

Амэрыканскі прафэсар пэдагогікі Дэвід Шаффэр (David Williamson Shaffer) раіць сучасным школам перагледзець базавыя прынцыпы навучаньня. Ён рэкамэндуе ўжываць кампутаровыя гульні ў працэсе вучобы для таго, каб дзеці былі лепей падрыхтаваныя да ўмоваў будучай працы. Па яго меркаваньні, сучасная сыстэма адукацыі сфармавалася ў канцы XIX стагодзьдзі і была першапачаткова прызначаная для выхаваньня працоўных індустрыяльных прадпрыемстваў, а зараз часы зьмяніліся.

На думку прафэсара Шафэра, аўтара кнігі «Як кампутаровыя гульні дапамагаюць дзецям вучыцца», зараз акалічнасьці цалкам іншыя. Заходняму грамадзтву больш не патрэбныя працоўныя рукі (сусьветная фабрыка перамясьцілася ў Паўднёва-ўсходнюю Азію), затое адчуваецца востры недахоп спэцыялістаў інтэлектуальнай працы: інжынэраў, праграмістаў, журналістаў, дызайнэраў і іншых крэатыўных асобаў, здольных да інавацыяў. Усе яны павінны быць прафэсійнымі карыстальнікамі кампутара — вось чаму да яго трэба прывучаць зь дзяцінства.

Для лепшага разьвіцьця дзіцячага мозгу, гаворыць Шаффэр, трэба максымальна нагружаць яго ў шматзадачным рэжыме з актуальнымі задачамі: дзецям трэба слухаць музыку падчас кампутаровых гульняў, глядзець відэа, бадзяцца у інтэрнэце, перадаваць адзін аднаму паведамленьні з дапамогай кампутараў і мабільных тэлефонаў. Усё гэта адначасова з вывучэньнем біялёгіі, гісторыі, фізыкі і іншых традыцыйных навукаў.

Урады Вялікабрытаніі і Сынгапура ужо распрацавалі адукацыйныя праграмы, якія прадугледжваюць выкарыстаньне кампутаровых гульняў і іншых тэхналягічных сродкаў у школьнай праграме. Больш таго, кампутаровыя гульні актыўна выкарыстоўваюцца для навучаньня салдатаў у войску, а таксама для навучаньня супрацоўнікаў у некаторых карпарацыях.

Дэвід Шаффэр і яго памагатыя распрацавалі цэлы шэраг кампутаровых гульняў, якія ўжо зараз можна пачынаць выкарыстаць у адукацыйным працэсе. Сярод іх адмысловыя гульні, якія навучаюць журналістыцы, гарадзкой пляніроўцы, геннай інжынэрыі і іншым творчым працам.