Ва Ўкраіне прынялі рэвалюцыйны закон пра вышэйшую адукацыю

Закон значна пашырае аўтаномію ўніверсітэтаў і дае грамадскасці болей механізмаў для кантролю за дзейнасцю ВНУ.

Барацьба за заканадаўчую рэформу вышэйшай адукацыі ва Ўкраіне ішла з 2009 году. За гэты час прайшло шмат студэнцкіх акцый пратэсту, які былі накіраваныя супраць зменаў, што ініцыявала папярэдняя ўлада. Пасля ўцёкаў Януковіча Вярхоўная Рада змяніла кіраўніцтва Міністэрства адукацыі і прыняла за аснову праект грамадскай працоўнай групы. Цяпер закон быў прыняты ў другім чытанні. 

Сярод ягоных асноўных новаўвядзенняў: 

• дэцэнтралізацыя кіравання адукацыяй і абмежаванне паўнамоцтваў Мінадукацыі, 
• вялікая фінансавая аўтаномнасць ВНУ, 
• адмена дзяржаўнай акрэдытацыі (у тым ліку магчымасць самастойна ўніверсітэтамі прысуджаць навуковыя ступені),
• свабода ў кампаноўцы навучальных планаў і праграм,
• жорсткія пакаранні за плагіят,
• новы механізм выбірання рэктараў (галасуюць усе выкладчыкі і да 15% студэнтаў),
• рэктароў выбіраюць не больш, чым на два тэрміны (5+5),
• змяншаецца нагрузка на выкладчыкаў і студэнтаў,
• адмяняецца панятак «спецыяліст», уводзіцца двухгадовая магістратура і PhD.

Закон створаны на аснове крытэраў Еўрапейскай адзінай прасторы адукацыі.