Кіеўскія студэнты абвясцілі страйк і ладзяць калону на #ЄвроМайдан

Студэнты двух сталічных украінскіх ВНУ абвясцілі пра пачатак страйку з 26 лістапада. Каля 1500 студэнтаў Кіеўскага нацыянальнага універсітэта далучыліся да студэнтаў Кіева-Магілянскай Акадэміі.  

У нядзелю ў цэнтры Кіева сабралося каля 100 тысяч пратэстоўцаў. Фота pravda.com.ua

Студэнты Ўкраіны з’яўляюцца актыўнымі ўдзельнікамі пратэстных акцый, што працягваюцца ўжо некалькі дзён з-за раптоўнай адмовы ўкраінскіх ўладаў падпісваць пагадненне аб асацыяцыі з Еўрапейскім Саюзам.

Паводле звестак выдання «Ўкраінская праўда», студэнтаў на страйк афіцыйна адпусціў рэктарат. Яны маюць намер рушыць на Еўрапейскую плошчу ў цэнтры Кіева, дзе адбываецца бестэрміновая акцыя супраць згортвання еўраінтэграцыі.

Прарэктар КНУ Уладзімі Бугроў напісаў у студэнцкай суполцы vk.com/knustudents:

«Мы не забараняем нашым студэнтам выяўляць сваю грамадзянскую пазіцыю і браць удзел у мітынгах. Гэта немагчыма не з юрыдычнага не з маральнага пункту погляду».

З панядзелка таксама страйкуюць студэнты ў Івана-Франкоўску, яны абвясцілі бестэрміновую акцыю пратэста. Кіраўніцтва львоўскіх ВНУ заявіла падтрымку студэнцкай супольнасці.

«Тыя, хто едзе на Еўрамайдан у Кіеў, — маюць паважлівую прычыну пропуска пар». — заявілі ў рэктараце ЛНУ.