VI Эўрапэйская студэнцкая канвэнцыя

23-27 кастрычніка 2003 ў Палерма (Італія) адбудзецца VI Эўрапэйская студэнцкая канвэнцыя, якая будзе прысьвечаная тэме "Роля вышэйшай адукацыі ў эканоміцы, заснаванай на ведах: задачы да 2010 года”. (“The role of higher education in the knowledge based economy: objectives for 2010"). Арганізуе канвэнцыю эўрапэйскае аб’яднаньне студэнцкіх арганізацыяў ESIB (Нацыянальныя студэнцкія зьвязы ў Эўропе), а таксама італійскі студэнцкі зьвяз UDU. Інтарэсы беларускіх студэнтаў у Эўропе прадстаўляе Задзіночаньне Беларускіх студэнтаў.

Гісторыя Эўрапэйскіх студэнцкіх канвэнцыяў пачалася ў Парыжы, калі прэзыдэнтам Эўразьвязу была Францыя, у лістападзе 2000. З таго часу студэнцкія канвэнцыі былі праведзены ў Гётэборгу, Брусэлі, Дуброўніку і ў Афінах (люты гэтага году).

Гэтая канвэнцыя праводзіцца, калі прэзыдэнтам Эўразьвязу зьяўляецца Італія, пры фінансавай падтрымцы Эўракамісіі. Падчас канвэнцыі студэнты хочуць абмеркаваць асноўныя пастановы разнастайных эўрапэйскіх і міжнародных інстытуцыяў наконт ролі, мэты і адказнасьці вышэйшай адукацыі ў грамадзтве, заснаваным на ведах, а таксама ў працэсах, што адбываюцца ў сфэры адукацыі.

Аналізу патрабуюць Балоньскі працэс (The Bologna Process); Лісабонскія задачы Эўразьвязу (EU Lisbon objectives); Агульнае пагадненьне па гандлі паслугамі (GATS); Эўрапэйская навуковая прастора (the European Research Area); пастановы Unesco, Савета Эўропы, Сусьветнага банку (World Bank), таксама як і пазыцыю эўрапэйскіх рэктараў, прафсаюзаў і наймальнікаў.

Мэта – паглядзець на вельмі складаную і дынамічную прастору вышэйшай адукацыі ў Эўропе, прэзэнтаваць і абмеркаваць узаемную сувязь і супярэчнасьці паміж гэтымі працэсамі і агульнае значэньне грамадзтва, заснаванага на ведах: што гэта значыць у жыцьці, а таксама што складае ролю студэнтаў ва ўсім гэтым.

Удзельнікі канвэнцыі сфакусуюцца на мэтах і задачах да 2010 года. Куды мы рухаемся, а таксама якая пазыцыя ESIB адносна праблемы?

ESIB скарыстае канвэнцыю, каб выпрацаваць сваю пастанову і стратэгію на наступныя гады. Кастрычнік 2003 зьяўляецца стратэгічным момантам для таго, каб пракамэнтаваць сустрэчу Сусьветнай гандлёвай арганізацыі (WTO) у Канкуне, а таксама сустрэчу Эўрапэйскіх міністраў у Бэрліне; на працягу гэтага месяцу Эўразьвяз таксама зьбіраецца падвесьці рысу пад дыскусіямі аб будучыні Эўропы і эўрапэйскай Канстытуцыі.

Старшыня ESIB кажа:"Я вельмі спадзяюся на адкрытыя дэбаты, гарачыя дыскусіі, крэатыўныя працоўныя групы, новыя мэтады, ідэі, цікавыя сустрэчы, шмат працы і пры гэтым шмат вясёлых момантаў!”