«Эгіпет, народжаны наноў». І для вандроўнікаў таксама

Што адбываецца з краінай пасьля рэвалюцыі і роспуску КДБ? Хтосьці падумае: «Выбары!» А вандроўнік прыгадае шматлікія перашкоды, што чыняць спэцслужбы ў час перасоўваньняў па краіне. Пострэвалюцыйны Эгіпет — добры прыклад таго, як лёгка наноў адкрыць краіну для сьвету.

Цяпер самы час для вандроўкі ў Эгіпет: турыстаў амаль няма, свабоды як ніколі шмат. Фота baptistegiroudon.com

«Эгіпет, народжаны наноў», — такія словы можна, па сьведках вандроўнікаў, сустрэць на білборах па ўсёй краіне. У сэнсе адкрытасьці для замежнікаў гэта сапраўды так.

Раней большасьць усіх вандровак па краіне строга кантралявалася мясцовай службай бясьпекі праз сыстэму стукацтва жыхароў. Замежнікам нельга было спыняцца на начлег у хатах мясцовых жыхароў, нельга было вандраваць мясцовымі цягнікамі, ночыць у пустэчы ці на беразе мора. За многія з гэтых учынкаў можна было сесьці ў турму. Турызм працякаў шмат дзе ў агароджаных калючым дротам рэзырвацыях для турыстаў з кругласуткавай аховай аўтаматчыкаў.

Сытуацыя зьмянілася пасьля сыходу з паста прэзыдэнта Эгіпта Хосьні Мубарака, які кіраваў краінай каля 30 гадоў. Празь некалькі тыдняў пасьля яго ад’езду са сталіцы Каіру быў ліквідаваны мясцовы КДБ — служба дзяржаўнай бясьпекі «Джыхаз амн ад-даўля». У краіне яе называлі не інакш, як галоўным органам рэпрэсіўнай сыстэмы падчас праўленьня Мубарака.

Служба перасьледавала палітычных апанэнтаў улады і налічвала каля 100 тысячаў супрацоўнікаў. Мяркуецца, што на рахунку «Джыхаз амн ад-даўля» ўмяшальніцтва ў прыватнае жыцьцё грамадзян, катаваньні, падтасоўка вынікаў выбараў і шэраг іншых парушэньняў правоў чалавека.

Па сьведчаньні вандроўнікаў, пасьлярэвалюцыйны Эгіпет пазбавіўся паліцыі, што атручвала жыцьцё ўсім турыстам, якія жадалі свабодна перасоўвацца па краіне. Тыя нешматлікія яе прадстаўнікі, што ўсё ж сустракаюцца на дарозе, паводзяць сябе ветліва і карэктна і ўступаюць у дыялёг толькі тады, калі да іх зьвяртаюцца.

«Падобна да фантастыкі», — дзеліцца ўражаньнямі расейская блогерка, што нядаўна вярнулася з паездкі па гэтай краіне.

Цяпер замежнікам у дамах эгіпцян можна ночыць, нават езьдзіць на мясцовых электрацыях у Сярэднім Эгіпце і вылазіць на паўстанку пасярод ночы, маючы намер паспаць на станцыі пару гадзін да раніцы без усялякага гатэлю.

«Хіба што на вялікіх станцыях замежнікам у касе квіткоў на „мясцовыя“ цягнікі да гэтага часу не прадаюць. Але каго гэта калі турбавала?» — дадае блогерка.