25 сьнежня калядная містэрыя «Елка Дзеда Мароза»

Арганны канцэрт заўсёды ўяўляецца сур’ёзнай камэрнай падзеяй. Аднак на Каляды могуць здарацца цуды: клясычны канцэрт пераўтвараецца ў сьвяточную сяброўскую містэрыю.

Такі цуд здарыцца 25 сьнежня 2008 года, калі сапраўдны ЦУД — Цэнтар Удасканальваньня Драматургіі — пад кіраўніцтвам рэжысэра Мюра Фарыдовіча, прадставіць калядную казку — містэрыю «Елка Дзеда Мароза» у суправаджэньні аргану. Ролі ў містэрыі выконваюць: Віктар Жыбуль, Вера Бурлак (Джэці), Макс Жабовіч, Мюр Фарыдовіч.

Фота з рэпэтыцыі містэрыі. Аўтар фота: Алесь Малама

14 сьнежня 2008 года ў Менскай Новаапостальскай царкве адбылася рэпэтыцыя каляднай містэрыі «Елка Дзеда Мароза», якая аб’ядноўвае ў сабе пастаноўку рэжысёра Мюра Фарыдовіча паводле п’есы Сяргея Новіка-Пяюна «Елка Дзеда Мароза» і арганны канцэрт Юрася Габруся.

Як прызнаецца рэжысёр Мюр Фарыдовіч, калядная містэрыя заўсёды застаецца дзействам, у аснове якой палягаюць старыя біблейскія сюжэты, усім вядомыя і пазнавальныя, ад якіх кожны раз мы чакаем ачышчэньня і адкрыцьця. Калядная містэрыя «Елка Дзеда Мароза» павінна паказаць, як важна дзецям быць паслухмянымі, а бацькам больш артыстычнымі ў пошуку сродкаў выхаваньня.

Па словах выканаўцы ролі Дзеда Мароза, кампазытара Макса Жабовіча, ідэяй дадзенай містэрыі зьяўляецца далучэньне гледачоў да высокіх сфэраў прыгожага мастацтва праз пасрэдніцтва сцэнічнай дзеі, якая спалучае ў сабе лёгкі даступны сюжэт, жывую арыгінальную падачу і арганную музыку.

У арганным канцэрце Юрася Габруся, які адбудзецца адразу пасля п’есы, прагучаць творы Баха, Гендэля, Леклера, Страдэля, Фарэ, Фрыскабальдзі-Касады, у суправаджэньні Алены Карагінай (скрыпка), Аляксандра Луцэвіча (флейта), Вольгі Альхоўскай (віялянчэль), Ільлі Кучура (клярнэт), якія ўдзельнічаюць у гэтай ды іншых імпрэзах царквы выключна на дабрачынных пачатках. Самі музыкі радыя ўдзелу ў такім праекце, паколькі ён зьяўляецца ўнікальным для беларускай культурніцкай прасторы і адкрывае новыя творчыя гарызонты.

Калядная містэрыя «Елка Дзеда Мароза» адбудзецца 25 сьнежня 2008 года.