Паэтычны дзявочнік і мужчынскі стрыптыз у бібліятэцы

Пяць прыгожых і таленавітых беларускіх паэтак зладзілі ў бібліятэцы імя Цёткі прэзэнтацыю сваіх кніжак. Атрымалася ядрана і па-дзявочаму міла. Дзяўчаты-паэткі «выдавалі замуж» свае кнігі, а хлопцы зладзілі «паэтычны стрыптыз».

Зборнікі вершаў — рэч ня самая хадавая, таму паэты і паэткі шукаюць новыя формы рэклямы, займаюцца сынтэзаваным мастацтвам, аб’ядноўваюцца, запрашаюць мужчын на стрыптыз, няхай і паэтычны. «Паэтычны дзявочнік» — крэатыўная ідэя Вікі Трэнас.

Беларускі паэтычны фронт быў прадстаўлены дзявочым дэсантам у складзе Юліі Новік, Тацяны Нілавай, Вольгі Чайкоўскай, Марыйкі Мартысевіч і Вікі Трэнас.

Тацяна Нілава з «Готыкай тонкіх падманаў».

Кожная з гэтых прыгажунь па чарзе выходзіла перад гледачамі, адчыняла свой ружовенькі з кветачкамі, альбо сіненькі ці іншага яркага колеру нататнічак і пачынала цьвёрдым голасам зачытваць свае вершы. Некаторыя чыталі зусім сьвежае, напрыклад «толькі з мора», нехта меў закладку з пазнакай усіх цікавых старонак са сваіх новых выданьняў.

Юля Новік прэзэнтуе «Сонца за тэрыконамі».

Для большасьці паэтак прэзэнтаваныя выданьні былі першымі ў жыцьці. Выключэньне складала паэтка зь Менску Віка Трэнас, «Экзыстэнцыйны пэйзаж» якой — ўжо другі паэтычны зборнік.

Студэнтка журфаку БДУ Вольга Чайкоўская дык увогуле выдала ў Віцебску свайго «першанца» «Лупы» самвыдадатам, што зусім не пагоршыла якасьць кнігі. «Лупы» Чайкоўскай выглядалі тут надзвычай цікава, бо кніга суправаджаецца дваццаціхвілінным візуальным шэрагам на вершы паэткі. Воля разам з дызайнэрам Юрам Круглікавым ажывіла свае вершы, надаўшы ім трэцяе, бадай творчае, вымярэньне. Фільм быў прадэманстраваны гледачам, што пазбавіла Волю неабходнасьці нешта чытаць асабіста.

Вольга Чайкоўская прэзэнтуе «Лупы».

Цьвіком імпрэзы стаў традыцыйны для любога дзявочніка стрыптыз. Прайшоў ён у межах выступу імпазантнай Марыйкі Мартысевіч, дэбютную кнігу якой «Цмокі лятуць на нераст» рэдагаваў Андрэй Хадановіч.

Марыйка Мартысевіч з «Цмокамі, якія лятуць на нераст».

Выконвалі стрыптыз тры паэты: Андрэй Адамовіч, які прапанаваў толькі што напісаны «Нэпаліткарэктны верш», італьянец Рабэрта Баначыні, які прадэманстраваў усю мілагучнасьць італьянскай мовы, і паэт Андрэй Хадановіч.

Італійскі паэт Рабэрта Баначыні.