У Менску стала адразу на пяць кіназаляў болей

У гэту суботу, 13 верасьня, у сталіцы прайшлі першыя кінапаказы ў нядаўна адноўленым кінатэатры «Беларусь». Адбудаваны ў стылі, які спалучае элемэнты хай-тэку і беларускага постсавецкага калярыту, кінатэатар зьяўляецца першым у краіне мультыплексам.

Афіцыйнае адкрыцьцё адбылося яшчэ ў пятніцу паказам скандальная беларускай стужкі «На спине у черного кота» з удзелам унучкі прэзыдэнта.

У суботу ж усе пяць заляў агульнай зьмяшчальнасьцю 1028 чалавек адчынілі дзьверы для простых сьмяротных.

Даволі сьціплы па памерах у параўнаньні з эўрапейскімі аналягамі (віленскі мультыплекс, напрыклад, мае 10 заляў і тры паверхі супраць аднаго беларускага), кінатэатар можна назваць лепшым у Беларусі. Невялікі хол, зь якога можна трапіць ва ўсе пяць невялікіх заляў зь мяккімі чырвонымі крэсламі, аздоблены партрэтамі беларускіх кіназорак.

«Беларусь» ужо абяцаюць уключыць у лік «прэм’ерных», то бок тых, дзе галоўныя блёкбастэры дэманструюцца ў першую чаргу. На гэты момант кінатэатар прапануе адразу шэсьць фільмаў, якія ідуць, бывае што і адначасова. Першы сэанс у выходныя пачынаецца ў 12:00. Уваход каштуе 7500. Апошні сэанс, насуперак ранейшым абяцанкам пра начныя кінапаказы, пачынаецца ў 21:50 і каштуе 9000.