Міністэрства аховы здароўя прапануе павялічыць тэрмін разьмеркаваньня для маладых мэдыкаў
На сёньня маладыя мэдыкі адпрацоўваюць па прымусовым разьмеркаваньні тры гады з улікам інтэрнатуры. Наколькі павялічыцца гэты тэрмін, чыноўнікі пакуль не паведамляюць.
«Мы ўносім прапанову аб павелічэньні тэрміна разьмеркаваньня з мэтаю замацаваньня кадраў на месцах», — цытуе Белта словы міністра аховы здароўя Васіля Жарко.
Верагодна, гэта рэакцыя міністэрства аховы здароўя на нядаўнюю рэзкую заяву Лукашэнкі пра незадаволенасьць вынікамі сыстэмы прымусовага разьмеркаваньня выпускнікоў.
«Паступіў у сельскагаспадарчую ВНУ — ідзі і працуй на сяло. Нікому ня будзе дазволена проста адпрацаваць нейкі тэрмін па разьмеркаваньні і перайсьці на іншую працу. Без дазволу старшыні райвыканкаму ніхто ня зможа перайсьці на іншую працу. Мы прыдумаем, як гэта зрабіць, каб не наламаць дроваў. Вось і ўся дэмакратыя. Але без гэтага сяло мы не выратуем, як і ахову здароўя», — заявіў напрыканцы чэрвеня гэтага году выпускнік Горацкай сельскагаспадарчай акадэміі Аляксандар Лукашэнка.