Аголеныя мэксыканскія роварысты пратэставалі супраць непавагі да сябе з боку кіроўцаў
Сотні аголеных раварыстаў праехалі ў нядзелю па вуліцах сталіцы Мэксыкі з патрабаваньнем паважлівага стаўленьня да сябе з боку кіроўцаў аўтамабіляў.
Голыя роварысты ў Лёндане восеньню 2007 года, фота з spiegel.de
Больш 500 мужчын і жанчын, палова зь іх – без адзежы ехалі па цэнтры горада і скандавалі: «Выратуйце плянэту, езьдзіце на роварах!». У некаторых на сьпінах былі намаляваныя выразы «экалягічна бясьпечны сродак руху».
Па словах аднаго з удзельнікаў акцыі, «тое, што на нас няма адзежы, азначае, што мы не нябачныя. Аўтамабілісты не паважаюць нас, яны лічаць, што мы – галаўны боль».
Мэхіка зьяўляецца адным з найболей забруджаных гарадоў сьвету. Штогод на яго вуліцах колькасьць аўтамабіляў павялічваецца на 250 тысяч.
Мэксыканцы не арыгінальныя ў сваёй акцыі, падобныя заезды праводзіліся раней ў Мадрыдзе, у Парыжы, Лёндане ды іншых гарадох сьвету.
Хоць Менск пакуль і не такі забруджаны як Мэхіка, беларускія роварысты таксама часта сутыкаюцца зь непавагай з боку кіроўцаў аўтамабіляў. Раварысты пакуль не распранаюцца, каб зьвярнуць на сябе ўвагу, але рэгулярна ладзяць акцыі «Крытычная маса».