«Единая Россия» прайграла выбары... ў ЖЖ

Па дадзеных расейскай ЦВК «Единая Россия» на парляманцкіх выбарах 2 сьнежня набрала 64,1% галасоў. Інтэрнэт — асобны сьвет, Рунэт — асобная краіна. Таму і галасы жж-выбарцаў разьмеркаваліся іншым чынам.­

Таксама ЦВК Расеі паведамляе, што прайшлі 7-адсоткавую мяжу КПРФ (11,6%), ЛДПР (8,2%), «Справедливая Россия» (7,8%).

Непасрэдна ў дзень выбараў было забароненым публікаваць дадзеныя exit-poll. Але інтэрнэт абыйшоў гэтыя забароны: эксклюзіўныя дадзеныя зьявіліся на партале Главред.

ЖЖ актыўна падхапіў экзіт-пулы: апытанкі зьяўляліся на старонках юзераў як грыбы пасьля дажджу, дакладней, падчас))

Напрыклад, да 22.00 другога сьнежня ў апытанцы sholademi удзел узялі тры тысячы чалавек. Трохі меней за траціну паведамілі, што на выбары ўвогуле не хадзілі. Галасы астатніх разьмеркаваліся наступным чынам:

• Союз правых сил — 25,2%;
• «Яблоко» — 12,6%;
• КПРФ — 10,7%;

Афіцыйны лідэр «Единая Россия» нават не дацягнула да 7%-й мяжы, набраўшы ўсяго 5,4%.

А вось на рэальных выбарах «Союз правых сил» набраў толькі адзін адсотак галасоў расейцаў.

Натуральна, што выбарка ў жж-апытанках вельмі вузкая і не адлюстроўвае сытуацыі па краіне, але часткова тлумачыць настроі і перавагі прасунутай часткі расейскага грамадзтва.­