Эўразьвяз спросьціць візавы рэжым для Ўкраіны

Эўрапарлямэнт прагаласаваў за спрашчэньне візавага рэжыму для Ўкраіны. Згодна адпаведнаму пагадненьню, украінцы будуць плаціць за візу 35 эўра, а асобныя катэгорыі грамадзян, у тым ліку і студэнты, змогуць атрымаць візу бясплатна.

Пагадненьні аб спрашчэньні візавага рэжыму і рэадмісіі былі падпісаныя 18 чэрвеня ў Люксэмбургу, а парафіраваныя — 27 кастрычніка 2006 у Хэльсынкі падчас саміту Ўкраіна-ЭЗ.

Зараз за набыцьцё пагадненьнямі моцы прагаласавалі і дэпутаты Эўрапарлямэнту.

Але сьпярша Ўкраіна мусіць адмяніць візы для грамадзянаў Румыніі і Баўгарыі з мэтаю аднолькавага стаўленьня да усіх грамадзянаў краінаў Эўразьвязу.

Пагадненьне аб спрашчэньні візавага рэжыму для Ўкраіны прадугледжвае фіксаваны кошт візавага збору — 35 эўра. Асобныя катэгорыі грамадзян, у тым ліку студэнты, журналісты, сваякі, змогуць атрымаць візу бясплатна.

Па новым пагадненьні консул, у выпадку адмовы, мусіць патлумачыць прычыну.

Дзеяньне пагадненьня ня будзе распаўсюджвацца на Данію, Ірляндыю і Вялікабрытанію.

Пагадненьне аб рэадмісіі акрэсьлівае дакладныя крытэры калі і як вяртаць асобаў, якія незаконна пражываюць на тэрыторыі краінаў-сябраў ЭЗ і Ўкраіны. Палажэньні пагадненьня аб рэадмісіі набываюць моц пасьля двух год ад пераходнага перыяда.

На тэрыторыі Даніі пагадненьне дзейнічаць ня будзе.

Канчаткова ратыфікаваць дакумэнт мусіць Рада міністраў Эўразьвязу. 

Паводле УНИАН­ ­