Глушылкі змагаюцца з надакучлівымі размовамі па мабільным

У Амэрыцы рэзка ўзрос попыт на глушылкі для мабільных тэлефонаў. Цяпер прыпыніць гучную гутарку ў грамадзкім месцы вельмі проста — дастаткова націснуць на маленькую пімпачку ў сваёй кішэні.

­

Стаміліся ад «інтэлектуальных» гутарак нашых суайчыньнікаў на ўвесь аўтобус? Ня можаце сканцэнтравацца ў бібліятэцы, таму што «прэкраснае» стварэньне на ўсю залю дамаўляецца аб набыцьці курсавой? Або спатканьне з каханай/-ым псуе тоўсты дзядзька за суседнім столікам, які крычыць на ўсю рэстарацыю «Ты чо, Калян, не дарубаеш»? Тады мы ляцім да вас! Дакладней, папрасіце сяброў у ЗША даслаць вам адтуль глушылку для мабілак.

Гэтая прылада, афіцыйна забароненая, патрапіла ў топ-продажы ў Амэрыцы. Ідэя ня новая, але такім попытам глушылкі яшчэ не карысталіся.

«XXI стагодзьдзе характарызуецца тым, што людзі ніяк не абмяжоўваюць сябе дзеля іншых. Тыя, хто размаўляе па мабільным, зусім не зьвяртаюць увагі на тых, хто навокал, і лічаць сябе правымі. Тыя ж, хто глушыць мабільнікі, знаходзяць свае правы больш істотнымі», — кажа Джэймс Кэтц, кіраўнік цэнтра Мабільных камунікацыяў.

Кошт прылады — ад 50 даляраў да некалькіх сотняў. Дзеяньне: блякіроўка сыгналу ад радыюсу 10 мэтраў і да стварэньня бессыгнальнай зоны.

Прычым, пакуль глушылка не працуе, заўважыць яе радарам немагчыма. Таксама нябачная яна і воку — прылада проста месьціцца ў кішэні.

Мабільным апэратарам, вытворцам тэлефонаў і паліцыі пакуль толькі і застаецца, што разводзіць рукамі.

Фота - tech.co.uk­ 

­
Каментары праз FACEBOOK



 
In 0.0739 seconds.