Сёньня стартуе чарговы «Кінафармат 4Х4»

Пачынаючы ад сёньня і да 20-га траўня ў менскіх кінатэатрах «Аўрора», «Перамога», «Мір» і «Цэнтральны» пройдзе чарговы паказ фільмаў у межах праекту «Кінафармат 4Х4». Гэтым разам будуць паказаныя карціны «Нацюрморт», «Рэінкарнацыя», «Перапісваючы Бэтховэна» і «Выбары».

Драма «Нацюрморт» (Ганконг-Кітай) рэжысёра Чжан Ке Джыа ўганараваная прэміяй «Залаты леў» на 63-м Вэнэцыянскім кінафэсьце. Гэта гісторыя жыхароў вёсачкі, амаль затопленай пры будаўніцтве плаціны. Пры гэтым новы раён, куды павінны эвакуяваць сялян, яшчэ не пабудаваны. Фільм распавядае пра людзей, што разгубіліся ў новым індустрыяльным сьвеце.

У праграму «Кінафармату» уключаныя таксама жахі ад японскага рэжысэра Такашы Шыміцу «Рэінкарнацыя». У 1970 году ў японскім гатэлі адбылася трагедыя, якую пазьней прызналі адной з самых жудасных за ўсю пасьляваенную гісторыю Японіі. Пісьменьнік, які жыў у гатэлі, па-зьверску забіў уласную сям'ю і усіх супрацоўнікаў гатэля, пасьля чаго пакончыў з сабою, не раскрыўшы матывы злачынства. Праз 35 гадоў адзін рэжысэр вырашае зьняць па гэтай гісторыі фільм і запрашае на галоўную ролю маладую акторку, якую зь цягам набліжэньня здымак пачынаюць перасьледаваць кашмары.

Драма «Перапісваючы Бэтховэна» (Нямеччына-ЗША) Агнэшкі Холланд распавядае пра некалькі эпізодаў з жыцьця вялікага кампазытара. Падзеі разгортваюцца вакол яго стасункаў з асыстэнткай, якая дапамагае кампазытару ў працы над Дзевятай сымфоніяй.

Крымінальная драма «Выбары» (Ганконг) Джона То апавядае аб барацьбе за вярхоўную бандыцкую уладу.

//Паводле Naviny.by