"А ну-ка, дзяўчаты"
29 сакавіка ў актавай залі ліцэя БДУ прайшоў конкурс сярод інтэрнатаў унівэрсытэту "А ну-ка, дзяўчаты", які звычайна называюць "Міс вясна". Самыя прыгожыя дзяўчыны прадстаўлялі свае інтэрнаты. Кожная з іх марыла аб перамозе. Але "Міс дасканаласьцю" магла стаць толькі адна.
Гэта ня проста конкурс на самую мілую мардашку. Тут дзяўчыны мусілі праявіць сябе як рознабакова разьвітых асоб. Бо праграма складалася з трох конкурсаў: візытка, кліп і творчая частка.
Тлумачу. Спачатку дзяўчына прадстаўлялася. Зразумела, што гэта трэба было зрабіць як мага больш арыгінальна. Трэба ж неяк вылучыцца з агульнай масы.
Было бачна, што дзяўчыны вельмі хваляваліся. Ну канешне, як тут ня будзеш хвалявацца, калі на цябе глядзяць адразу дзьве тысячы вачэй, ды яшчэ й кожная група падтрымкі спадзяецца на перамогу менавіта сваёй прыгажуні :)
Далей кліп. Тут трэба было прапанаваць сваю інсцэніроўку да пэўнай песьні. Адзначу, што ў гэтых нумарах удзельнічалі ня толькі канкурсанткі, але й прадстаўнікі інтэрнатаў. Ой, дык вам тут кліпаў на любы густ: ад эксцэнтрычнага "Sex bomb" да лёгкіх і рамантычных гукаў французскай шарманкі, ад "песняроўскага" "Біла дзеўку маці..." да загадкавага "Era". У творчай частцы многія дзяўчыны сьпявалі, нехта танчыў, карацей, тут ужо, як кажуць, хто, на што здольны. Асабліва запомніўся танец з распрананьнем адной з канкурсантак :)
У паўзах паміж конкурсамі выступалі артысты. Ня буду распавядаць пра пародыі на расейскіх Губіных, а лепш адзначу саліста гурта "Моцарт". Ён выйшаў на сцэну, і тут нечакана высьветлілася, што "дыск не чытаецца". Але хлопец не разгубіўся. І прапанаваў залі сьпець акапэльна "Купалінку". О, гэта цудоўна, калі з вуснаў тысячы людзей адначасова чуеш гукі: "Купалінка, цёмная ночка..."!
І вось самы напружаны мамэнт. Хто ж пераможа? Прыз глядацкіх сымпатыяў атрымоўвае Аксана Ліцкевіч з інтэрнату №10... І ўвага! "Міс даскналасьцю БДУ-2007" становіцца... Заля заціхае, вядучы урэшце вымаўляе: "Кацярына Лін!" Такім чынам Каця Лін з інтэрнату №5 атрымоўвае галоўны тытул. А разам з тытулам забірае свой прыз - гэта падарожжа ны дызельным цягніку "Менск-Кіеў-Менск":) Нашы віншаваньні!