Мінабароны аспрэчыла інфармацыю аб адтэрміноўках для жанатых прызыўнікоў

Міністэрства абароны аспрэчыла паведамленьні аб тым, што жанатым прызыўнікам будзе давацца адтэрміноўка ад прызыву на тэрміновую ваенную службу і службу ў рэзэрве.

Як паведамілі карэспандэнту БЕЛТА у прэс-службе Мінабароны, новым законапраектам аб унясеньні зьменаў і дадаткаў у Закон Рэспублікі Беларусь "Аб воінскім абавязку і воінскай службе" адтэрміноўка прадугледжаная толькі для тых прызыўнікоў, жонкі якіх цяжарныя (па-за залежнасьцю ад тэрміна цяжарнасьці). Пры гэтым для атрыманьня адтэрміноўкі ў ваенкамат неабходна будзе падаць даведку аб цяжарнасьці жонкі.

Але ў МА ўдакладнілі, што гэтыя папраўкі пакуль не ўступілі ў сілу. Зараз дзеючым заканадаўствам для грамадзяніна, якога прызываюць на тэрміновую ваенную службу і службу ў рэзэрве, прадугледжаная адтэрміноўка ад прызыву толькі ў тым выпадку, калі яго жонка знаходзіцца ў адпачынку па цяжарнасьці і родам (30 тыдняў цяжарнасьці і больш).