Сёньня ноч гіганцкага Месяцу

І гэта не звычайная поўня, а самая вялікая ў гэтым годзе. У ноч з 25 на 26 кастрычніка Месяц будзе на 14% больш і на 30% ярчэй, чым у час іншых поўняў 2007 году. ­

Пра такі незвычайны стан Месяцу паведамляе spaceweather.com.

Поўны абыход Зямлі па эліптычнай арбіце Месяц робіць за 27,7 сутак. У выніку яго адлегласьць да Зямлі і вуглавы дыямэтар, пад якім дыск Месяцу бачны людзям, пастаянна зьмяняецца. Зьмены вуглавога дыямэтру пр­ы гэтым дасягаюць 10%. У выніку, Месяц у апагеі (на адлегласьці 402 620 км) меней Месяцу ў пэрыгеі (на адлегласьці 366 180 км) на адну дзесятую долю ўласнай велічыні.

Поўня на гэтым тыдні супадае са знаходжаньнем Месяцу ў пэрыгеі, таму й атрымліваецца такі эфэкт.

А раз у 20 год можна назіраць цалкам асьветлены гіганцкі Месяц двойчы за адзін месяц.

Спэцыялісты папярэджваюць, што ў поўню ня варта глядзець на Месяц у тэлескоп без адпаведных абарончых фільтраў, інакш можна пашкодзіць вочы.