Ці верыце вы ў сэкс зь першага позірку?

Пытаньне пра грошы энтузіазму не выклікала. Большасьць нашых мужчынаў грошы траціць не зьбіраецца – адным няма што, іншым – няма на каго…

Праз гэта пытаньне мы амаль не згубілі найпрымнейшага суразмоўцу – Міхала Анемпадыстава. Пачуўшы пытаньне пра грошы, ён засьмяяўся: «Я не хачу на гэту тэму ўвогуле гаварыць. Вы мяне выкрэсьліце з гэтага апытальніка вашага». Але мы яго ўпэўнілі, што наступнае пытаньне будзе тычыцца штодзённага жыцьця – і запыталіся пра сэкс зь першага позірку: «Гэта ня тычыцца 14 лютага? Ну, у прынцыпе да, чаму не?» 

Пакуль дзесьці хтосьці доўга ды філязафічна разважае на тэму каханьня зь першага позірку, пагаджаецца ці не, спрачаецца ці марыць, сто адсоткаў нашых апытаных з радасьцю ў голасе запэўнілі, што ёсьць ён, сэкс – галоўнае разгледзіць. І нават праз слухаўку адчувалася гэтая хітрая усьмешка…

Прыкладам, Аляксандар Кульлінковіч адразу ж паставіў усе кропкі над і: «Так, веру. Вось у каханьне зь першага позірку ня веру, а сэкс – гэта вельмі добрая рэч, карысная». Але на пытаньне карэспандэнткі, як часта верыць, дадаў дзіўным чынам: «Не, ня часта. Ні разу». Грошы Аляксандар не зьбіраецца траціць – дома сядзець будзе. Бо і сьвятам гэты дзень ня лічыць. На прапанову публічна сказаць «Я кахаю…» адказаў як адрэзаў: «Не! Не магу. Не цікавы я суразмоўца.»

Наша Гран-пры ў пытаньнях сэксу мы аддаем Адаму Глёбусу, у якога сэкс не зь першага позірку, «а зь першага дотыку». Так як побач зь Глёбусам знаходзілася ягоная каханая жанчына, якой, не называючы імя, ён і прызнаўся ў каханьні, можна зрабіць высновы аб эфэктыўнасьці дотыкаў у параўнаньні з позіркамі – галоўнае дацягнуцца! Грашовыя пытаньні таксама вырашыліся проста: «Вось на мяне тут любімая жанчына глядзіць – мне давядзецца сказаць, што я пляную патраціць шмат...» 

Ня ўсім так пашанціла. Бывае – ёсьць што патраціць, ды няма на каго. Так, дырэктар кавярні «Стары Менск» і бару «Лёндан» Аляксандр Астрашэўскі зьбіраецца даляраў 200 на сьвята выдаткаваць. А вось у каханьні няма каму прызнацца, хоць публічна і змог бы, але «няма сур’ёзных пачуцьцяў». Пытаньне пра сэкс, як заўжды, знайшло водгук у адзінокім мужчынскім сэрцы: «Канешне веру! Ужо дарослы – было рознае…»

Ігар Варашкевіч таксама 14 лютага будзе адзін: «Я не пляную траціць грошы, таму што 14-га я нічога сьвяткаваць ня буду: маёй каханай зараз у горадзе няма…» Мы прапаноўвалі Ігару публічна, праз наш сайт, прызнацца ёй у каханьні, але ён адмовіўся: «Я ў прынцыпе магу, але стараюся гэтага не рабіць». Ці верыць ў сэкс зь першага позірку - лідэр Крамы адказаў, як і належыць рок-н-рольшчыку: «Ну, безумоўна веру. Гэта вельмі рэдка, як каханьне.»  

Часова адзін, але з прычыны адсутнасьці каханьня, і Паша Кашырын: «Магу публічна сказаць пра каханьне. Але гэта зусім асабістыя справы. Зараз я нікога не кахаю. Сябраваць я таксама не сябрую зь дзяўчынамі.» Мо, таму, што Паша «ніяк да гэтага сьвята не ставіцца». Хаця, зь іншага боку дадаў: «Лепш я буду рабіць увесь час штосьці выключнае, кожны дзень!». Ну, золата, а не мужчына! «А дзе гэта потым можна будзе прачытаць? А хто яшчэ, акрамя мяне, адказваў з зорак?» Як бачыце – усе і ўсё тут і зараз. Нават пра сэкс: «Не тое што веру. Тут ужо асабістыя абставіны павінны быць. Нейкія акалічнасьці. Каб усё спрыяла інтымным сувязям. Вы такія пытаньні задаеце! Гэта можа мець мейсца.»

Пра неабходнасьць пэўнай атмасфэры – каб зь першага позірку ўсё атрымалася – паведаміла нам і Ганна Вольская: «Ну, канешне, ёсьць сэкс зь першага позірку, безумоўна ёсьць нейкія такія флюіды. Гэта можна спыніць, калі крышачку падумаць. Але бывае, такія моцныя гэтыя флюіды, асабліва калі спрыяльная абстаноўка: калі жанчына не з сумкамі, ёсьць мора, пальмы. Або калі проста тыпажы сустракаюцца прывабныя.»

Але падчас нашай размовы атмасфэра была ня тая, таму прызнавацца ў каханьні ў Ганны «не было настрою». Наконт грошаў сьмяецца: «Я думаю, што не я патрачу. 14 лютага – такое сымбалічнае сьвята. Сэрцайкі розныя, гэтыя марцыпаны… У нас неяк прынята ў Беларусі, што мужчына траціць грошы.»

Але ж мы ведаем – лепш Ганьне пачакаць якога іншага сьвята, бо як напярэдадні распавёў нам пра свае фінансавыя пляны Лявон Вольскі: «Ну, ніхто не плянуе, як атрымаецца. На падарунак, канешне, патрэбны нейкія грошы. На Дзень Сьвятога Валянтына як бы ня дорацца глябальныя такія падарункі, як аўтамабілі ці кампутары. Звычайна проста праявы ўвагі некаторыя. Бутэльку віна можна набыць. Дарагавата, канешне, але нармальна.»

Ну і наша любімае пытаньне. Ня тое, каб адказ зьдзівіў… «Менавіта ў сэкс? Слухайце, ну канешне! Што значыць, я веру? Я ведаю… Гэта вельмі прынята ў сучасным сьвеце.»

Відавочна, у нас атрымаўся пэўны гендэрны дысбалянс. Хутчэй за ўсё, пакуль мужчыны не зьбіраюцца траціцца на падарункі, жанчыны рэжуць, лепяць ды малююць гэтыя няшчасныя сэрцайкі, вяжуць шалікі ды шкарпэткі ці пякуць «Напалеон». Але ж атрымалася вылавіць Тамару Лісіцкую, якая нам выклала як на далоні ўсе валянтынаўскія сакрэты.

«Я ўжо патраціла грошы. Ня вельмі шмат. Таму што ў нас наперадзе 23 лютага, 22 – Дзень народзінаў маёй маці, розныя дробныя суботы-нядзелі… таму набыла самае неабходнае: мужу – тры гальштукі, сыну – канструктар-самалёт, дачцэ – гульню-рыбалку...»

І нават падзялілася прыватным досьведам сэксу-каханьня зь першага… гуку!

«Я даўна замужняя жанчына і казаць пра сэкс зь першага позірку было б дзіўна з майго боку. Але ў нас з мужам недалёка ад гэтага адышло, калі мы ўжо пачалі пра гэтыя падрабязнасьці казаць. Каханьне было жорсткае.  Зь першага гуку! Я ў яго закахалася, калі пачула. Таму, калі мы сустрэліся, было б ненатуральна не пачаць дзейнічаць актыўна.»

Ня дзіўна, што і ў каханьні Тамара прызналася зь лёгкасьцю:

«Я кахаю цябе … муж! Я люблю цябе, сын! Я люблю цябе, дачка! Я люблю вас, маці і тата! Можна было б сказаць і "Я люблю цябе, народ!". І, агулам, тое было б шчыра. Але народу ад мяне гэта будзе дзіўна чуць.»

Мужчыны! Бярыце прыклад з нашых жанчынаў! Мы ж не падатковая і не паліцыя нораваў. Таму шчырасьці болей і сьмеласьці. А то Саша Ракавец з IQ48 пра колькасьць грошаў яшчэ ня ведае, у каханьні пакуль публічна не прызнаваўся, але ў сэкс зь першага погляду «канешне!» верыць. Адзінае што, на жаль, сэкс той у каханьне не перарос… Але IQ48 пішуць і граюць новыя песьні – якраз на рэпэтыцыі мы яго і знайшлі. А гэта – падарунак, лепшы за любыя грошы!

Улюблёны наш гурт RAHIS таксама не адпачываў напярэдадні сьвята. Дзёня й Зьміцер, ідучы з рэпэтыцыі, таксама згадзіліся паўдзельнічаць у нашай сьвяточнай апытанцы.

Далей пайшла прапанова распавесьці пра грашовыя пляны на Дзень закаханых…

Дзёня: «На дзевак, у сэнсе? Ну пастараюся нічога не траціць. Буду старацца не выходзіць з дому. Каб не траціць грошы. Званіць няма каму…»

Хутчэй за ўсё, RAHISы і ў сераду будуць разам – Зьмітру таксама няма на каго траціць грошы. Пры гэтым Зьміцер упэўніў публічна, што «любіць усіх», а Дзёня можа прызнацца ў каханьні публічна толькі калі «дзеўка нармальная».

Падаецца, нават калі RAHISы схаваюцца дома – іх усё роўна знойдуць! Ёсьць варыянт паехаць у Кактэбель – там і сонейка, і мора… Згодна Ганьне Вольскай, атмасфэра спрыяе - ўсё будзе зь першага позірку. Без падману :) 

Зьміцер Вайцюшкевіч, напрыклад, не пакутуе ад недахопу аб’ектаў любві: «Беларусы, я люблю вас! Усё, я прызнаўся. Люблю усіх вас! Studenty.by люблю :)»

Свае сьвяточныя выдаткі Зьміцер сьпярша хацеў затаіць – «сакрэт фірмы», але пад націскам здаўся – «сотня, другая…»

Гэта ж як і сэкс: «Ну як можна гэта камэнтаваць? Гэта ж сэкс зь першага позірку! Як пойдзе, так пойдзе…»

Улада Савельева  - крэатыўшчыка рэклямнай агенцыі Крынь – сьвята ўсіх закаханых ня моцна натхняе. Усё, што ён пакуль зьбіраецца набыць – «талёнчык на аўтобус туды і назад». Добра, хоць у сэкс зь першага позірку верыць: «Веру. Так проста веру. Гэта нейкае такое незразумелае пачуцьцё. Імгненна ўзьнікае і так жа сама зьнікае. Было, было… Некалькі разоў.»

Найбольш сур’ёзна паставіўся да нашай апытанкі пераможца конкурсу Yandex па пошуку Ігар Маханёк: «Гэта табе для чаго такая інтымная інфармацыя? Гэта будзе статыстыка, ці з маім імём і прозьвішчам будзе напісана?.. Не шкада, можна і імём падпісацца.» Гэта пакуль толькі пытаньне пра грошы! 

«Але ж я ніяк не плянаваў свае расходы на 14 лютага. Тысяч 50… на вельмі добрую дзяўчыну.  Як мінімум, і можа яшчэ некалькі на ня менш добрых, але не такіх блізкіх. А на што? Як мінімум – на рамантычны вечар. Пра падарунак я яшчэ ня думаў.» 

А вось зараз будзе пра першы позірк: «У сэкс зь першага позірку? Веру, чаму б не? Асабліва калі тое ўжо дакладна мае месца быць. Як часта? Неяк нельга рэгулярнасьці ў гэтым заўважыць. Як калі атрымліваецца. Гэта кожны раз незвычайна і не падобна ні на што. Што значыць зь першага позірку? Я думаю, у першую хвіліну знаёмства такога не бывае.»

Далей - пра духоўную блізкасьць, характар і погляд на жыцьцё. Пра экстрым і першае каханьне…

«Мне было б вельмі цікава пабачыць мае словы перад тым, як выкладзеце. А то выставіце мяне вычварэнцам сэксуальным.»

Ігар! Ну што вы? Які вычварэнец? Вы ж першы з усіх (!) пра душу, характар, каханьне…

А вось Філіп з Drum Ecstasy ня тое каб проста пра сэкс ці там пра каханьне – ён пра важныя рэчы нагадаў: «Так, веру ў сэкс зь першага позірку – ён вядзе да СНІДу ды іншых вэнэрычных захворваньняў».

Само сьвята Філіп ненавідзіць: «Ня люблю масавыя мерапрыемствы. Сьвяткаваў гэты дзень у 80-90-я гг. А зараз выкарыстоўваю яго толькі як падставу зарабіць грошы, калі гурт грае.»

Публічна прызнацца ў каханьні Філіп ня толькі можа, але ўжо і рабіў гэта са сцэны – менавіта адтуль ён зрабіў прапанову сваёй жонцы. 

Такім чынам, атрымліваецца, што, па вялікім рахунку, якое ж гэта сьвята? Вось сэкс зь першага позірку – гэта сьвята, у незалежнасьці ад даты. Але ня трэба забывацца на бясьпеку – рознае можа здарыцца. І атмасфэру трэба стварыць адпаведную – ніякіх сумак, лэп-топаў і лепш падалей ад сьнягоў. І галоўнае – верыць, бо ўсе ж мелі станоўчы досьвед! ­

Большасьць адказала, што могуць публічна прызнацца ў каханьні. Але не зараз. Ды і не заўсёды ёсьць каму. То праўда! Калі няма каму, і грошы не дапамогуць. А вось калі грошыкаў няма ці ня хочацца зь імі разьвітвацца – прапануем рабіць падарункі «зрабі сам»: маляваць паштоўкі, нават карціны, складаць вершы, вышываць крыжыкам, пячы блінчыкі з суніцамі. Дый увогуле – проста казаць адзін аднаму паболей няхітрых, простых такіх словаў…

Мы Вас усіх любім!

Даша Слабчанка,
Тэлефанавалі героям матэрыялу з нахабнымі пытаньнямі Ганна Краснова, Кася Сарокіна, Даша Слабчанка. Падтрымлівала ўся каманда праекту :)