«Дзе Тубс?» — пад такімі пытаньнямі мне прыйшлося піць піва ўсю першую гадзіну меркаванага канцэрту The Toobes у менскім Re:public. 

«Признавайся, сука, ты вчера был на Площади?» — гэта радкі з «адаптаванай» пад беларускую сытуацыю кампазыцыі «Милиционер будущего» ад «сацыяльна-быцьцёвага» гурту «Макулатура», што даў на выходных у Менску запар два канцэрты, чым адразу зрабіў заяўку на далучэньне да сьпісу забароненых. Аднак рэперы-макулатуршчыкі ня толькі парадавалі менскую публіку вострым выкрыцьцём палітычнай сытуацыі, але й пасьпелі прайсьціся па хіпсьцерах і «іншых аматарах артхаўзу» хвацкімі літаратурнымі тэкстамі.

Калі пятнічным вечарам вас незнарок занясе ў сталічны клюб, багатая колькасьць кедаў на танцпляцы, што вянчаюць рознакаляровага фасону вузкія джынсы, забясьпечаныя шэрымі байкамі і клятчастымі кашулямі, сьведчыць толькі аб адным: куміры менскіх хіпсьцераў The Toobes зьявяцца сёньня на сцэне. У якасьці канвы зоркам — бясплатны фэст з элемэнтамі бульбы і ўкраінскага раздольля «Перкалаба» ды беларускага космасу ад «Касіяпеі».