Міністры спрачаюцца аб кошце беларускіх візаў

Міністэрства спорту і турызму Беларусі накіравала ва ўрад прапановы па спрашчэньні візавага рэжыму для замежнікаў. Калі на тое пагадзіцца Міністэрства замежных спраў і Лукашэнка, кошты на візы могуць быць зьменшаныя альбо ўвогуле скасаваная плата за іх. Найперш візы стануць таньнейшым для туркаў, літоўцаў і палякаў.

«Пасьля ўхваленьня прапаноў урадам яны накіруюцца на разгляд кіраўніка дзяржавы», — заявіў у інтэрвію БелТА дырэктар дэпартамэнту па турызьме Міністэрства спорту Вадзім Кармазы.

Мінспорту прапанавала іншым ведамствам некалькі варыянтаў: альбо цалкам скасаваць плату за беларускія візы, альбо значацца зьнізіць іх кошты з адменай даплаты за тэрміновасьць.

У пачатку красавіка ўрад Беларусі агучыў плян па аблягчэньні візавага рэжыму для замежных турыстаў. Візавы рэжым мяркуецца спрасьціць з краінамі, грамадзяне якіх часьцей за ўсё наведваюць Беларусь у турыстычных мэтах.

Паводле дадзеных Міністэрства замежных спраў, па візах да нас прыехала толькі 32 тысячы турыстаў. Найперш гэта былі грамадзяне Турцыі, Польшчы і Літвы.

Дадзеныя Міністэрства замежных спраў

Па прагнозах Мінспорту, страты ад нявыплаты консульскага збору турысты кампэнсуюць праз плату за тавары і паслугі, а таксама дзякуючы зьяўленьню новых працоўных месцаў у турыстычнай галіне.

«Візавы рэжым значна зьніжае канкурэнтаздольнасьць турыстычнага прадукту і зьяўляецца дадатковым стымулам выбару іншай краіны для падарожжа», — лічыць Вадзім Кармазы.

Цікава, што адным з галоўных праціўнікаў спрашчэньня візавага рэжыму дагэтуль было беларускае МЗС:

«Адмена візавага рэжыму дастаткова адчувальны крок, яна патрабуе комплекснага ўліку інтарэсаў дзяржавы, уключаючы пытаньні грамадзкага правапарадку і нацыянальнай бясьпекі», — аргумэнтаваў паўгады таму ў інтэрвію газэце «Туризм и отдых» нежаданьне МЗС ісьціна на аднабаковае спрашчэньне візавага рэжыму кіраўнік консульскага ўпраўленьня Аляксандр Астроўскі.

Па дадзеных Мінспорту, праз візавы рэжым колькасьць турыстаў з Эўразьвязу, якія наведваюць Беларусь, за апошнія гады зьменшылася амаль у два разы. У 2009 годзе Беларусь зарабіла на выдачы візаў каля $22.4 млн., а ў 2008 годзе, калі беларускія візы каштавалі меней, — $29.8 млн.