Цуды сьвету расчароўваюць турыстаў
Так і ня здолелі вырвацца на адпачынак і наведаць якое культавае турыстычнае месца? Ня варта сумаваці - большасьць турыстаў расчароўваецца, калі ўвачавідкі бачыць знаёмыя па паштоўках і кніжках мясьціны і забудовы. У «чорным сьпісе» нават Эйфэлева вежа і Мона Ліза.
Эйфэлева вежа, Букінгемскі палац, Стоўнхэдж… Мільёны людзей вандруюць па сьвеце, каб убачыць культавыя турыстычныя месцы. Але, на жаль, доўгае чаканьне спатканьня з легендай абарочваецца глыбокім расчараваньнем. У Брытаніі правялі дасьледваньне, у выніку якога сталася, што большасьць людзе не знаходзіць таго, што шукала, выпраўляючыся за сотні кілямэтраў ад дому.
Прывабнасьць таямнічых старажытных забудоваў альбо вялікіх дасягненьняў інжынэрнай думкі не вытрымлівае сутыкненьня з такімі раздражняльнікамі, як аўтамабільныя пробкі, натоўпы турыстаў і надакучлівыя гандляры.
Рэспандэнты апытанкі назвалі Стоўнхэдж, Эйфэлеву вежу, Таймс-сквэр і эгіпэцкія піраміды сярод тых турыстычных аб’ектаў, якія больш за ўсё іх расчаравалі.
Дасталася і Мона Лізе: неабходнасьць праціскацца да зусім маленькай, як сталася, карціне, яшчэ раз спраўдзіла, што ў Лувр хадзіць – толькі час марнаваць.
Стоўнхэдж - першы ў чорным сьпісе па Вялікабрытаніі. Ужо даўна наведвальнікі скардзяцца, што ён заціснуты між дзьвюх вялікіх аўтастрад.
Праблема ў тым, што турысты чакаюць занадта шмат ад выдатнасьцяў сьвету. Да таго ж яны спадзяюцца ўбачыць культавыя месцы не сутыкаючыся з натоўпам іншых турыстаў. А гэта немагчыма.
Больш за ўсё брытанцаў за мяжой расчаравалі:
- Эйфэлева вежа (Парыж)
- Мона Ліза (Лувр, Парыж)
- Таймс-сквэр (Нью-Ёрк)
- Лас-Рамблас (Барсэлёна)
- Статуя Свабоды (Нью-Ёрк)
- Гішпанская лесьвіца (Рым)
- Белы дом (Вашынгтон)
- Піраміды (Эгіпет)
- Брандэбургская брама (Бэрлін)
- Пізанская вежа