Фотарэпартаж: бізнес-клуб і каворкінг Imaguru адкрыў другое дыханне

Вядомая мінская пляцоўка, дзе нараджаюцца і растуць шматлікія беларускія IT стартапы, значна пашырыла свае магчымасці. У аўторак 20 студзеня адбылося афіцыйнае адкрыццё новых памяшканняў Imaguru, якія павялічылі прастору і магчымасці каворкінга ў два разы.

На вечарыну з нагоды адкрыцця сабраліся сябры і партнёры Imaguru. Заснавальніцы бізнес-клуба, Наста Хамянкова і Тацяна Марыніч, распавялі пра новыя магчымасці для наведнікаў і рэзідэнтаў клуба, якія з'явіліся з адкрыццём новых пляцовак, і прадставілі новыя памяшканні.

Пляцоўка Imaguru зусім нядаўна адзначыла першы год сваёй працы ў горадзе, але яе наведнікі няспынна здзіўляюцца, калі прыгадваюць малады ўзрост праекта. Імклівае развіццё Imaguru, якое ажыццяўляе надзвычай жывая каманда, стварае пачуццё, нібы Imaguru з'яўляецца неад'емнай часткай Мінска ўжо вельмі даўно.